Parayee Peerh Ko Saiaban Nahi Kartay-Riaz Shahid

 پرائے پیڑ کو ہم سائباں نہیں کرتے

ملے بہار تو اس کو خزاں نہیں کرتے

کھلی کتاب کے جیسی ہے زندگی اپنی

کوئی بھی زاویہ اپنا نہاں نہیں کرتے

تری کہانی میں ہے کذب کی ادا ورنہ

جو سچی بات ہو اس پر گماں نہیں کرتے

چھپاتے لوگ ہیں کینہ زبان میٹھی میں

کسی کے سامنے دُکھ یوں بیاں نہیں کرتے

جہاں میں عشرت و آسائشوں کے بدلے میں

فقیر کانٹوں کی ہر گز دکاں نہیں کرتے

بہت ضروری ہے کردار اور سیرت پر

کسی کی ذات کو لیکن نشاں نہیں کرتے

یہ زندگی تو ہے مہمان چند گھڑیوں کی

ملے جو لمحۂ فرقت زیاں نہیں کرتے

سنا کے درد بھری داستان لوگوں کو

ہم اپنے زخموں کو ہر گز عیاں نہیں کرتے

غرورِ ذات میں ڈوبے ہوئوں کی بات نہ کر

وہ اپنے ظرف کا چرچا کہاں نہیں کرتے

تپش ہو عشق کی دل میں جو مثلِ پروانہ

تو نارِ زیست سے پھر الاماں نہیں کرتے